Ինչու՞ է անհրաժեշտ, որ մեքենան կանգ առնի
Ինչու՞ է անհրաժեշտ, որ մեքենան կանգ առնի։ Որովհետև ցանկացած մեքենա ունի փչանալու հատկություն։ Եվ այն սարքելու համար առաջին հերթին պետք է կանգնեցնել մեքենան ։ Հիմա պրոյեկտենք այս ամենը դեպի քաղաքական դաշտ․ տվյալ պահին գլխավոր մեքենան, իհարկե, ՀՀԿ-ն է։ Բավականին մեծ մեքենա է, բաղկացած է լավ, միջին և վատ ավտոմասերից, բայց խնդիրն այն է, որ շարժիչը փչացել է (բավականին երկար է աշխատել)։ Իսկ դա նշանակում է, որ այն պետք է կանգ առնի վերանորոգման՝ ժամանակավոր, իհարկե։ Բայց քանի որ մեքենաները սպասարկում են մարդկանց և մարդիկ սպասել չեն սիրում, ապա ուղևորներին սպասարկելու համար ի հայտ են գալիս այլ մեքենաներ։ Հիմա վերադառնանք քաղաքականություն, որպեսզի ՀՀԿ մեքենան կարողանա արագընթաց շարժվել, այն պետք է կանգնի վերանորոգման՝ դառնա ընդդիմություն։ Ընդդիմություն դառնալու մեջ վատ բան չկա, էլի հայ մարդիկ են։ Ընդդիմություն լինելու ընթացքում կվերաիմաստավորվի անցյալը, նորովի կուրվագծվի ապագան։ Իհարկե, հնարավոր է, որ մեքենան ընդհանրապես ենթակա չէ նորոգման և այն կուղարկեն պատմության գիրկը։ Ընդդիմությունների հետ դա հաճախ է պատահում․ նաև գաղափարի կամ ֆինանսների բացակայության պատճառով։

Սերժ Սարգսյանը տարիներ առաջ արտահայտել է այս միտքը. «Հայաստանի միակ ռեսուրսը՝ Ժողովրդավարական պետություն կառուցելն է, պետության զարգացման այլ ռեսուրս մենք չունենք»։

Ամբողջությամբ կիսում եմ այդ միտքը։ Բայց որպեսզի պետությունը համարվի ժողովրդավար, գոյություն ունի չգրված չափանիշ՝ այդ պետության մեջ պետք է ընտրություններով երկու անգամ անընդմեջ փոխվի իշխանությունը:

Փաստորեն, շատ հեռու ենք մեր նպատակից։
Շուտով նորից ընտրություններ են։ 

Օրինակ, եթե ասեմ, որ Վանաձորում անցնելու են միջազգային չափանիշներին համապատասխան ընտրություններ՝ հավասար հնարավորություններով, առանց կաշառքի և ճնշումների, դժվար թե մեկը դրան հավատա, բայց առնվազն մի բան հստակ է․ Վանաձորի վերջին համապետական երեք ընտրկան գործընթացներում  (2012թ ԱԺ-ի մեծամասնական ընտրակարգով ընտրություններ, 2013թ․ նախագահական ընտրություններ, 2015թ Սահմանադրական հանրաքվե) իշխանությունները պարտվել են, և դա պաշտոնապես արձանագրվել է։ Բայց, ցավոք, ՀՀԿ մեքենան առանց վերանորոգման փորձում է շարունակել  շարժվել առաջ՝  կործանելով նաև մեր երկիրը։ Բերեմ ընդհամենը մեկ օրինակ. Վանաձորի մեր շենքը բաղկացած է 50 բնակարանից, տվյալ պահին 20 բնակարանում ընդհանրապես մարդ չի բնակվում, իսկ մնացած բնակարաններում բնակվող գրեթե բոլոր ընտանիքներում առնվազն մեկ մարդ գտնվում է արտագնա աշխատանքներում։ Այդ ցուցանիշը բնորոշ է ոչ միայն Վանաձորին, այդպիսին է մեր մարզերի ամբողջական պատկերը,  բայց  վանաձորցիները հնարավորություն ունեն ՀՀԿ մեքենան կանգնեցնել վերանորոգման  և առաջ շարժվել այլ մեքենայով։  Եվ այդտեղ ոչ մի սարսափելի բան չկա․ և իշխանությունը, և ընդդիմությունը պետք է հասկանան, որ անփոխարինելի թիմեր և մարդիկ չկան, հակառակ պարագայում,  ցավոք սրտի, մենք ունենալու ենք նորանոր Սասնա Ծռեր, քանզի մարդիկ ուզում են փոփոխություններ։ 

Գրիգորի Դոխոյան